ShitClic

Un o ffans swnllyd a meddw Joe Calzaghe yn Vegas

Dyma ni, chwarter ffordd drwy’r flwyddyn sydd eisoes yn dipyn o glasur. Rhwng y paffiwr o Drecelyn, pencampwr dartiau o Ddinbych a’r gantores o Nefyn, Camp Lawn annisgwyl, dathliad dwbl Abertawe, a’r Bluebirds yn hofran i Wembley, ry’n ni’n prysur adael ein hôl ar y byd. Draw dros yr Iwerydd, mae Matthew Rhys yn mynd o nerth i nerth yng nghyfres boblogaidd Brothers & Sisters (E4, bob nos Sul) ac mae buddugwyr BAFTA Gavin and Stacey wrthi’n addasu’r fformat hynod lwyddiannus ar gyfer sianel NBC America. Mae Torchwood (“CSI Cardiff”) yn fwy poblogaidd na Doctor Who ar BBC America, tra bod gwylwyr o Siapan i Seland Newydd yn dilyn anturiaethau Tennant a Tate yn y Tardis. Ac mi glywaf eiriau ‘International Velvet’ Catatonia yn fy mhen…

Ond howld on Now Jon. Mae un neu ddau sy’n mynnu rhoi stop tap ar y siampên. Ac nid Saeson nac Albanwyr cenfigennus mohonynt chwaith. Y cyntaf yw’r actor o Ferthyr, Richard Harrington. Wrth siarad â’r Western Mail wythnos diwethaf, dywedodd nad yw Doctor Who wedi cael fawr ddim effaith ar y diwydiant yng Nghymru, a bod y cynhyrchwyr yn mewnforio criw Llundain i weithio arni yn stiwdios anferthol Trefforest. Waeth iddi fod wedi’i gosod ym Mirmingham, meddai. Hyn gan actor sydd wedi gorfod mabwysiadu acen Seisnig ar gyfer ei ran yn Holby Blue. Yr ail gysurwr Job yw Dirprwy Brif Weinidog y Cynulliad. Yn lle ymfalchïo yn llwyddiannau’r awdur Russell T Davies a Phennaeth Drama BBC Cymru, Julie Gardner, fe alwodd Ieuan Wyn Jones ar Gyfarwyddwr Cyffredinol y BBC i sicrhau bod mwy fyth o ddramâu gwreiddiol yn hanu o Gymru.

Haws dweud na gwneud, fel y sylweddolais ar gwrs sgriptio yng Nghaerdydd dros y Sul. Un o’r uchafbwyntiau oedd sesiwn gyda’r awdures ysbrydoledig Lucy Gannon a greodd gyfresi poblogaidd fel Peak Practice a Soldier Soldier pan oedd gan ITV adran ddrama gwerth sôn amdani. A gwnaf, mi wnai faddau iddi am ddod â  Robson a Jerome i’r byd. Yn frodor o Swydd Derby, mae hi bellach wedi ymgartrefu yn Aberteifi ac wedi dotio at ei hwyresau’n parablu’n braf yn Gymraeg. Dywedodd ei bod ar dân eisiau gwerthu cyfres ddrama am y Gymru gyfoes i brif gomisiynwyr BBC ac ITV… ond yn ofer. I ben (bach) bandits y rhwydweithiau, dyw drama Gymreig ddim ar frig eu hagenda ar hyn o bryd. Teg edrych tua Llundain a Manceinion yw hi o hyd i rai..

Croesawyd cyfres boblogaidd arall o stabl BBC Wales wythnos diwethaf hefyd. Mae Belonging yn ôl gyda’r gymysgedd arferol o helbulon a hiwmor iach pobol y cwm - gyda golygfeydd a deialog tipyn mwy coch na fersiwn Cwmderi. Mae’n anodd credu mai’r flwyddyn nesaf fydd degfed pen-blwydd y gyfres, a fydd yn ffarwelio gyda ffilm arbennig yn ôl y sôn. Efallai y bydd mwy o’r Lewisiaid, teulu craidd y cyfresi gwreiddiol, yn dychwelyd i’w cynefin bryd hynny gan mai dim ond Ceri Lewis (Eve Torchwood Myles) a’i mab Jake sy’n byw ym Mryncoed bellach. On’d oedden nhw’n ddyddiau da, gyda’r penteulu Margaret Lewis yn codi stŵr wrth garu â motobeiciwr ifanc, a’r triongl serch rhwng Ruth Lewis, ei merch a Moz! Collais rywfaint o ddiddordeb wedi chwalu’r teulu Lewis, a dyw cymeriadau newydd fel Des ag Asbo (Rebecca Harries, neu Sali Mali mewn hwdi!) a theulu’r dafarn heb gydio gymaint. Efallai ei bod hi’n ddoeth dod â’r cyfan i ben yn ei flas.

Gwahaniaeth arall rhwng hon a’r gyfres wreiddiol yw’r prinder enwau ‘mawr’ o Loegr. Gyda Gwen Taylor (Duty Free), Charles Dale (Coronation Street) a Jesse Birdsall (Eldorado druan) yn rhan o’r cast cychwynnol, y bwriad mae’n debyg oedd apelio at Brydain gyfan. Ond ar ôl sylweddoli nad oedd gan Lundain ‘run iot o ddiddordeb fel arfer, daeth pen bandits Llandaf at eu coed a chanolbwyntio ar eu hactorion a’u cynulleidfa gynhenid. A dau o wynebau cyfarwydd y gyfres newydd yw cyn-actorion Pobol y Cwm - gyda Jason/Rhys ap Hywel yn denu sylw’r merched lleol fel hyfforddwr ffitrwydd; a’r Parch Sabrina/Gillian Elisa yn hanner borcyn ar wely massage. Dim gair wrth Sara ac Anti Marian!

Lwc owt. Maen nhw’n ôl. Ydy, mae cefndryd Cymreig Doctor Who wedi dychwelyd am ail gyfres ar BBC2 bob nos Fercher. A sôn am bennod gyntaf! Yn yr olygfa agoriadol, cafodd hen wreigan (Menna Tussler) fraw o weld ’sgodyn mewn car yn stopio wrth y golau coch cyn cael ei erlid gan Gwen Cooper a gweddill y giang. A’r hen wreigan yn ysgwyd ei phen mewn anobaith, gan ddiawlio “Bloody Torchwood!”

Heb os, mae hiwmor yn rhan anhepgor o’r gyfres newydd, megis Capten John (James Marsters o’r cyfresi poblogaidd Americanaidd Angel a Buffy yn ôl pob tebyg) yn galw canolfan Torchwood yn “sewer chic”. Roedd ‘na gyffro, gyda’r golygu a’r gwaith camera yn gwibio o un olygfa i’r llall. Ac ydy, mae Caerdydd yn dal i edrych yn ffantastig fin nos, gan wneud defnydd da o’r unig ddau nendwr (skyscraper i chi a fi) sydd yn y brifddinas! Ac ar ôl  cwynion am y cyfresi cyntaf, mae’r sgriptwyr wedi rhoi’r gorau i regi gymaint, pan roedd hynny mor ddibwrpas yn lle cyntaf dim ond i gyfiawnhau’r slot hwyr.

Ac er bod John Barrowman hunanfoddhaol yn mynd dan fy nghroen i, a’r holl gyfeiriadau at ryw a rhywioldeb amwys y cymeriadau, dwi’n dal i wylio. Ac mae’n sicr y bydd y gyfres yn denu mwy o ddiddordeb gydag ymddangosiad hen gyfaill poblogaidd Doctor Who, sef Martha Jones (Freeman Agyeman), yn y dyfodol - cymeriad poblogaidd a gafodd ei gwaredu er mwyn gwneud lle i Catherine Tate… sy’n gythraul o gamgymeriad i lawer o’r ffans pybyr. Mae’n debyg fod y bennod gyntaf wedi denu 3.7 miliwn o wylwyr, gan ddenu ymateb cymysg fel arfer ar wefan Digitalspy a blogwyr y Guardian.