Ymadawiadau
Wps a deis. Mae’n debyg fod Sara wedi gadael dan gwmwl wedi’r cwbl, a’i bod wedi penderfynu mynd cyn cael ordors i glirio’i desg newyddion. A bod bosys y Bîb hyd oed rhy arw i gynnal parti ffarwel i’r graduras. Dychmygwch y penawdau petai ’na racsyn tebyg i’r Welsh Heat yn dechrau rhyfel ffug rhyngddi hi a Liwsi Lân.
Dyddiau da… Sara Edwards tua 1987
Mae’n bryd ffarwelio ag un arall o wynebau cyfarwydd BBC Cymru. Bydd Belonging yn dod i ben mewn nawfed cyfres y flwyddyn nesaf, a “grande finale” yn 2009 i ddathlu dengmlwyddiant y sioe. Yr opera sebon hon oedd ymateb y Gorfforaeth i ddrama gyffelyb, amaturaidd HTV ar y pryd, Nuts and Bolts, am drigolion ‘Ystrad’ yng nghanol mwynder Merthyr. Yn eironig, un o wynebau newydd y gyfres honno a ddaeth yn un o brif sêr Belonging wedyn – Eve Torchwood Myles.
Ro’n i’n ddilynwr brwd o’r cyfresi cyntaf am deulu Lewisiaid Bryncoed - gyda Gwen Taylor fel y penteulu, Margaret (ymgais aflwyddiannus i ddenu sylw a chynulleidfaoedd BBC Prydain efallai??) ei mab Steve (Charles Dale) a’i merch Ceri (Eve Myles) eu partneriaid a’u plantos. Roedd y golygfeydd rhwng William (William Thomas) a Vanessa (Di Botcher) wastad yn sicrhau llond bol o chwerthin iach. Ond yn raddol, dechreuais golli diddordeb wrth i’r gyfres ganolbwyntio fwyfwy ar y gymuned leol a chymeriadau newydd anodd cnesu atynt fel Asbo a Desiree. Difyr nodi bod tua hanner y cast yn Gymry Cymraeg, ac wedi bod trwy ysgol brofiad Pobol y Cwm. Diawch, roedd Dic Deryn a Lisa yn bâr priod cecrus ym Mryncoed!
Pwy sy’n Perthyn?
Falle ei bod hi’n hen bryd cael cyfres newydd, ffres, o’r Gymru Ddi-Gymraeg… y tu hwnt i Valleywood am unwaith! Beth am gyfres ddrama/sebon wedi’i gosod mewn maes carafannau neu barc gwyliau ar arfordir y gogledd neu’r gorllewin? Digon o ddeunydd gwrthdaro fan’no, rhwng y trigolion/gweithwyr lleol a’r ymwelwyr neu’r mewnfudwyr. Be amdani, Julie Gardner, Pennaeth Drama BBC Cymru?
