ShitClic

Un o gyfresi anhepgor Sky+ ar hyn o bryd yw Mad Men (bob nos Sul ar BBC4). Cyfres orwych gan Matthew Weiner, cynhyrchydd ac awdur cyfresi olaf The Sopranos, a enillodd dwy wobr Golden Globes 2007 am y ddrama orau, a’r actor gorau mewn drama deledu. Jon Hamm oedd yr actor dan sylw, a fo ydy Don Draper - un o gyfarwyddwyr asiantaeth hysbysebu Sterling Cooper, Madison Avenue, (sy’n esbonio teitl y gyfres) yn Efrog Newydd y 1960au. Byd o swyddfeydd myglyd, lle mae dynion croenwyn dosbarth canol yn rheoli yn y swyddfa a’r stafell wely, a lle mae’r merched yn sicr o’u lle fel ysgrifenyddesau a gwragedd tŷ. Byd o smocio sigarets Lucky Strike fel stemar ac wfftio adroddiadau’r Readers Digest am beryglon tybaco, byd y bariau coctel ac yfed a gyrru, byd lle mae pobl dduon yn gweithio yn y stafell gotiau ac yn glanhau’r tai bach. A’r cyfan yn digwydd ac yn dadlennu mewn ¾ awr hamddenol braf, lle nad yw’r cyfarwyddwr yn rhuthro o olygfa i olygfa nac yn ofni seibiau a golygfeydd hirion. Gwrthgyferbyniad llwyr i Dirty Sexy Money, sydd wedi’i ddileu o’m Sky+ er gwaethaf pedigrî actio fel Peter Krause (Six Feet Under) a Donald Sutherland, mewn drama-gomedi dros ben llestri am gyfreithiwr ifanc i deulu gwarthus o gefnog yn Efrog Newydd. Rhyw Dynasty ar speed, os leiciwch chi.

A chan fod y bali Bîb yn dal i chwarae mig hefo amserlen Damages, diolch byth fod gen i Sky+ i gofnodi gweddill y gyfres fendigedig hon sy’n prysur tynnu tua’i therfyn gwaedlyd. Gyda mwy o droadau annisgwyl na gwaith ffordd yr A470 ym Mlaenau Ffestiniog y dyddiau hyn, mae tynged y twrna ifanc Ellen Parsons (Rose Byrne) dan law’r arch-ast Patty Hews (Glenn Close) yn hoelio’r sylw o wythnos i wythnos.

Glenn Close a Rose Byrne ‘Damages’ - diawl o dîm da

Dwi’n filain efo BBC One a Channel Five. Dyma lle rydw ’n dilyn dwy raglen newydd Americanaidd yn slafaidd am y tro cyntaf ers Heroes, a beth sy’n digwydd? Mae’r pen bandits yn penderfynu potsian a’u symud i slotiau gefn liw nos. Ar y Bîb, mae’r gyfres orwych am hen gnawes galed o dwrna yn Efrog Newydd, Damages, lle mae Glenn Close (a enillodd deitl ‘Actores Orau’ yn y Golden Globes eleni) yn gwneud i Cruella De Ville ymddangos fel tedi bêr bach del, wedi symud i nosweithiau Lun am 10.35pm - a chyda phob pennod bron awr o hyd, mae hi braidd yn hwyr er mwyn codi cyn cŵn Caer(dydd) drannoeth. Pam na ffeindian nhw slot gall 9 o’r gloch iddi ar BBC2 neu BBC Four hyd yn oed? 

Mae’r bumed sianel, sydd fel arfer yn destun clod (CSI newydd sbon a gwaredwyr mawr Neighbours o’r Bîb), yn fwy euog byth am focha o gwmpas efo’r mewnforion Americanaidd. 30 Rock ydi’r rhaglen gomedi ddoniolaf dwi wedi’i weld ers hydoedd, wedi gosod mewn stiwdio deledu yn adeilad enwog 30 Rockerfeller Plaza, Efrog Newydd (eto!) ac sy’n dilyn hynt a helynt Liz Lemon (Tina Fey), prif sgwennwr sioe gomedi, i gael trefn mâs o anhrefn llwyr yn ei bywyd proffesiynol a chymdeithasol. Rhwng pawb a phopeth, gan gynnwys prif weithredwr ecsentrig y rhwydwaith, Jack Donaghy (Alec Baldwin pesgedig!), mae ganddi fynydd Hiraethog o dasg o’i blaen. Mae’n amlwg fod y ffigurau gwylio’n go giami, gan fod Five wedi’i symud o 10.40 i 11.05pm a’i thynghedu i bydru nes cael ei gwaredu’n llwyr. Damia damia damia nhw.

Stori debyg yw hi yn yr UDA hefyd, gyda Tina Fey yn herian wrth ddiolch “i’r dwsinau o wylwyr am gefnogi’r sioe” wrth dderbyn gwobr Emmy am y Gyfres Gomedi Orau yn 2007.