Sunday, October 7, 2007

Hyder yr Hen Ogledd

Dwi’n eiddigeddus o’n cefndryd ciltiog. Er nad oes gen i fawr o fynedd hefo nhw am anwybyddu’u hiaith gynhenid, maen nhw’n rhagori arnon ni’r Cymry mewn sawl maes. Mae Senedd Holyrood ar seiliau tipyn cadarnach na chynulliad mici mows Bae Caerdydd, mae’u tîm rygbi nhw mewn gwell siâp na’n primadonnas ni yn y Coupe du Monde de Rugby, ac mae’r diwydiant teledu Saesneg fil o flynyddoedd o’n blaenau ni. Mae cyfresi poblogaidd fel Taggart (1983 +) a Monarch of the Glen (2000 - 2005) wedi rhoi’r Alban ar lwyfan byd-eang,  Nos Wener ddiwethaf, dychwelodd Rebus i ddangos ochr dywyll Caeredin - a oedd yn edrych yn ffantastig yn y golygfeydd fin nos o Sedd Arthur. Mae Ken Stott yn chwarae rhan y Ditectif John Rebus i’r dim, ac yn nes at y darlun oedd gennyf i ohono wrth ddarllen nofelau Ian Rankin - y boi boliog sy’n smociwr ac yfwr heb ei ail - tipyn mwy credadwy na John Hannah yn y cyfresi cyntaf, a oedd yn denau a golygus o’r hanner.

  

‘Rebus’ a ‘Taggart’ - yn chwifio baner yr Alban ym mhedwar ban byd 

A beth am ein ditectifs Cymreig ni? Yr unig un diweddar sy’n dod i’r cof yw’r Ditectif Prif Arolygydd Noel Bain (Philip Madoc) yn A Mind to Kill, a’r fersiwn cefn-gefn ar S4C, Yr Heliwr (1994-2002), wedi’i seilio ar nofel wreiddiol Lyn Ebenezer. Do, fe gafwyd llwyddiant byrhoedlog y tu hwnt i Glawdd Offa, diolch i slot ar sianel Sky One ac yna Channel 5. Ac mae’n ymddangos fod y Bîb wedi rhoi’r gorau i gynhyrchu cyfresi ‘Cymreig’ ar ôl methiannau niferus fel y sioe sebon Tiger Bay (1997), cyfres am grwner yng nghefn gwlad Powys, Mortimer’s Law (1998) a Jack of Hearts (1999) gyda’r twmffat gwrth-Gymraeg Keith Allen fel swyddog prawf yn Kêdiff.

Ond beth am Torchwood, meddech chi? Iawn, mae Caerdydd yn ganolog i’r gyfres ffugwyddonol hon ac mae’r Gymraes Gwen Cooper (Eve Myles) yn aelod blaenllaw o griw Capten Jack. Ond y gwir amdani yw y gallai’r gyfres fod wedi’i lleoli unrhyw le yn y byd.

Mae Rebus ar y llaw arall mor Albanaidd â bagbibau sgrechlyd a chytew Mars bars. 

 

Posted by Gog y Cwm at 17:13:53 | Permalink | Comments (1) »