Sunday, 09 December 2007

Coroni Calzaghe!

Newydd weld canlyniadau cystadleuaeth BBC Sports Personality of the Year (sy'n deitl camarweiniol ar y naw, gan fod ambell un yn brin o unrhyw 'bersonoliaeth'. Llongyfarchion fil, haeddiannol, felly i Joe Calzaghe, sydd wedi ennill 44 gornest o'r bron; ac i'w dad Enzo ar ennill tlws Hyfforddwr y Flwyddyn. Mi fydd 'na ddathlu mawr yn Nhrecelyn heno! A dyna chi godi dau fys ar y bwcis a'r cyfryngau a'r wasg Seisnig oedd yn ffafrio'r gyrwr F1, Lewsyn Hamilton. Tro nesa' efallai. Ond eleni, Calzaghe bia'r clod. Go dda boi.





Posted by Gog y Cwm at 22:57:31 | Permanent Link | Comments (0) |

Friday, 07 December 2007

Cylchgrawn yr Wyl!
Dyma ni. Mae tymor y gormodedd, y gorwario, y goryfed a'r gorstwffio - a sawl ‘gor' arall - ar ein gwarthaf. Ac os ydan ni'n credu'r hysbysebion teledu, mae Alan Hansen a Lulu yn stocio i fyny ar siocledi a chwrw rhad ym Morisyns, Spice Girls yn gwthio trolis rownd Tesco Egstra/Metro lleol, ac Antonio blydi Banderas yn mwynhau piciad i Marks. Ond cyn i mi fynd ar fy mocs sebon Bâ Hymbyg, dyma gipolwg ar glawr y cylchgrawn anhepgor i bob aelwyd Nadoligaidd. Cyfuniad o Kylie a Corrie, debyg.  

Posted by Gog y Cwm at 19:56:10 | Permanent Link | Comments (0) |

Mawredd Mawr!

Cais i gwmni Al Fresco os gwelwch yn dda. Ga' i ddod ar brofiad gwaith pan fyddwch chi'n recordio'r bedwaredd gyfres o Mawr? Dwi'n giamstar ar wneud coffi, ac yn yrrwr pwyllog pan fydd angen cludo'r criw ar leoliad o amgylch y brifddinas. Ond peidiwch â disgwyl i mi gadw'n dawel yn y cefndir. Dim ffiars o beryg. Achos mi fyddai'n g'lana chwerthin am y gorau o wylio castiau cymeriadau'r Fast Show Cymraeg.


Cafwyd dechrau addawol iawn gyda pharodi o'r ffilmiau byrion hynny sy'n cyflwyno rhaglenni'r Sianel - y bygis golff a'u tebyg. Gwelwyd y camera yn tremio'n araf i ddangos goleuadau pier Penarth yn fflachio cyn cael eu ffiwsio gan ddau ddyn go chwithig yr olwg - sef prif actorion ac awduron y gyfres, Tudur Owen ac Iwan John - â'r logo blaensleisiog MAW/R ar y sgrîn wrth gwrs. Mae rhai o'r hen stejars yma o hyd, fel PC Leslie Wyn sy'n cael ei hun mewn mwy o lanast na phrif gopyn Heddlu'r Gogledd, a chriw rhaglen ddychmygol i blant, Dyna Hwyl! sydd mor ddi-chwaeth ag erioed yn yr 80au. Oedd Bilidowcar gynt mor ŵ-ŷ-misus-aidd â hyn? Ond ar y cyfan, mae myrdd o gymeriadau a sefyllfaoedd newydd yn y gyfres newydd (gyda rhai'n fwy llwyddiannus na'i gilydd - roedd y sgets ‘Dewch i Ddawnsio' yn llusgo braidd - faint o jôcs allwch chi wneud o ddawnswyr rhwmba'n rhechu?!). Dyna chi'r parodi o raglenni Trebor Edwards ers talwm, gyda'r ddeuawd yn pwyso ar eu ffyn bugail wrth forio canu ‘Wele'n sefyll rhwng y myrtwydd' cyn colli'u ffordd yn llwyr ar ôl i chwa o wynt chwythu'r dudalen â'r geiriau hollbwysig. Ac wele'r ddau yn ei la-la-la-io hi mewn cytgord perffaith, cyn gorffen gyda bonllefau o ‘Bread of Heaven' megis ffans meddwol Stadiwm y Mileniwm. Gwych.

Dwi'n siŵr fod trefnwyr teithiau yn diawlio'r sgriptwyr am eu portreadu fel rhai sy'n byw a bod dan wely haul, yn slochian pina coladas, smocio fel stemar, a meddyliau mor frwnt â landrofer mewn cae lleidiog. Croeso i Beryl, Cheryl a Meryl, a gafodd wahoddiad i gynghori pobl ar sut i drefnu'r gwyliau delfrydol ar raglen radio Hywel a Nia - er gwaetha'r ffaith bod un o'r triawd orenaidd yn meddwl mai Jônsi oedd yr holwr, a chamgymryd Nia Roberts fel y ddynes-gwneud-panad. Yn wir, mae'r gyfres megis A-Y o'r Sêr Cymraeg gyda rhai fel Beth Robert, Heulwen Haf ac Arfon Haines yn gwneud ymddangosiadau cameo. A braf gweld Gwenllian Jones yn ôl i ddangos ei doniau comedi ar ôl  sbel yn Awstralia. Prawf bod pen bandits y Sianel wedi maddau iddi ar ôl rhegi ar raglen fyw i blant, Noc Noc, sbel yn ôl. Diawch, mae hynny'n swnio fel sgets yno'i hun. Dyna Hwyl!



Yr amryddawn Tudur Owen -
sydd ar fin cyflwyno sioe siarad newydd yn lifrai campus PC Leslie Wyn yn fuan ar S4C

Posted by Gog y Cwm at 19:09:44 | Permanent Link | Comments (0) |

Wastad ar y tu fas?

Ym 1974, cafodd myfyriwr ifanc 18 oed ei anfon i ysbyty meddwl Dinbych am driniaeth ‘therapi anghymell'. Mewn geiriau eraill, triniaeth sioc hanner awr y dydd, bum niwrnod yr wythnos, am dri mis. Yr ail dro, cafodd ei roi dan glo yng nghanol cleifion wirioneddol sâl; "lŵnis" yn ei eiriau ef. Fe'i carcharwyd ar sail ei rywioldeb. Tri deg a thri o flynyddoedd yn ddiweddarach, dychwelodd John Sam Jones i safle'r seilam segur. Er ei fod yn amlwg dan deimlad, roedd criw ffilmio Fel Arall (Green Bay) yno i gofnodi pob deigryn wrth gwrs. 'Sdim ots am urddas personol rhywun, mae'n gwneud diawl o deledu da, tydy?

Cyfres o straeon personol iawn a gafwyd yn y ffilm ddogfen hon, yn amrywio o Gareth, perchennog ifanc "yr unig dafarn hoyw" yn y gogledd; i'r cwpl Beca a Gwawr. Roedd y ddwy wedi uno mewn glân bartneriaeth sifil ac eto ddim yn teimlo'n ddigon cyfforddus i gerdded law yn llaw 'lawr y stryd. Roedd Liz o Aberhonddu yn ddigon o gês i gyfaddef ei bod yn ymgnawdoliad o'r lesbiaid ystrydebol (torri'i gwallt yn fyr, cneifio, gwylio tîm rygbi merched yn y mwd) a Catrin o Aberystwyth yn trafod ei bywyd rhywiol fel petai'n trafod y tywydd! Yng nghanol hyn i gyd, bu John Bwlchllan a Richard Crowe yn trafod y cyd-destun hanesyddol a llenyddol, i gyfeiliant cerddoriaeth go sinistr. Doedd dim angen cyfraniad yr ysgolheigion mewn gwirionedd. Roedd hanes y gyflwynwraig/cynhyrchydd/cyfarwyddwraig Nia Dryhurst yn ddifyr ac yn ddigon yno'i hun. Rhyw damaid i aros pryd a gafwyd ganddi rhwng y pytiau personol eraill, o'i deffroad rhywiol o weld Olivia Newton John ar boster ‘Grease' i'r ymdeimlad o ryddid wrth fynd i'r coleg a chefn ar fyw celwydd Caernarfon. A'r tro bach yng nghynffon ei stori ar y diwedd, oedd ei gweld yn chwarae gyda'i mab bach blwydd oed ym Mharc y Rhath - ffrwyth triniaeth IVF lwyddiannus.

Er ei bod braidd yn rhy hir (90 munud), roedd hon fel chwa o awyr iach o gofio fod Cymry Cymraeg yn dueddol o fod yn swil o flaen y sgrin ac ofn pechu'r byd a'r ddynes drws nesaf. Y cyngor ar y diwedd oedd bod hyder a hunan-barch mor bwysig yn y gymdeithas hollgynhwysol, honedig, sydd ohoni heddiw.

Ac i chwalu'r hyder hwnnw'n llwyr, wele'r cyfryngau'n eu portreadu fel y cymeriad pantomeim Carl ar Pobol y Cwm sy'n gwneud i Mr Humphreys Are you being served? ymddangos fel Hulk Hogan.


Posted by Gog y Cwm at 18:58:03 | Permanent Link | Comments (0) |