Cerys, carioci a’r cogyddion
Glyn Wise ydy’r bai. Y fo ddechreuodd y busnas gwirion ‘ma. Na, nid cyfrannu at Gymraeg carbwl cyflwynwyr C2 Radio Cymru. Ar ôl diddanu gwylwyr Prydain gyda’i antics coginio a chanu, meddwi a mwydro yn nhŷ’r Brawd Mawr ddwy flynedd yn ôl, mae mwy o’i gydwladwyr wedi dilyn ei ôl-traed-teledu-realiti. Mae’r bariton o Bontsenni, Rhydian Roberts, wedi troi o fod yn destun sbort i fod yn ddarpar bencampwr rhaglen garioci ITV. Ar ôl cael sbec arno’n mynd trwy’i bethau ar raglen nos Sadwrn diwethaf, does dim dwywaith fod ganddo lais a hanner. Ond dwi ddim yn siwr p’un sydd ddifyrraf - ei wallt gwyngalchog a’i wisgoedd o wardrob Liberace, neu Simon Cowell, Danni Minogue a phob copa walltog Saesneg arall yn mwrdro ei enw. Beth bynnag fo’r canlyniadau cyn ‘Dolig, bydd enw Ruddy-ann neu Reed-ian yn enwog ledled lolfeydd Prydain. Cyd-ddigwyddiad llwyr yw’r ffaith ei fod yn mynd ben-ben â Chymro Cymraeg arall ar yr un amser bob nos Sadwrn, sef Gethin Planed Plant/Blue Peter Jones - un o’r ffefrynnau i ennill teitl siglwr pen-ôl y flwyddyn yng nghyfres ddawnsio’r Bîb. A phetai hynny ddim yn ddigon, mae Cerys Matthews wedi mentro i ganol ffau’r enwogion seren wib yn fforestydd glaw Queensland. Iawn, dwi’n cyfaddef ‘mod i’n gwylio mwy nag y ddyliwn i o’r sothach I’m a Celebrity Get Me out of Here! (ITV) oherwydd fy hoff gantores. Roedd ymateb fy nghydweithwyr yn amrywio o ddiffyg diddordeb llwyr i syndod a siom, a’r farn yn amrywio o “beth haru’r hogan?” i “pwy sy’n gwarchod y ddau fach”? Y Gymraes yw ffefryn y bwcis i gael ei choroni’n Frenhines y Jyngl o blith un o actorion anghofiedig Eastenders dros degawd yn ôl, model Americannaidd sydd mor blastig â pharti Tupperware, a chyn-ohebydd Sky Sports a ddiswyddwyd am ddweud jôc ddi-chwaeth am drychineb tswnami Indonesia. Wnaiff yr ymddangosiad hwn ddim drwg i’w halbwm newydd, a bydd y siec yn handi iawn i dalu’r morgais tua Sir Benfro. Felly, pob lwc i ti Cerys! Ond go brin y bydd hogiau Catatonia yn pleidleisio drostat…
Dychwelodd cyfres realiti arall i’n sgrîn bob nos Sul. Tra’r oedd Ffion Gwallt Dafis yn mynd fel mellten rownd Umbria yn ei lambretta, roedd deg cystadleuydd yn chwysu a choginio fel slecs yng Ngholeg Llandrillo er mwyn bachu lle i wyth yn ysgol goginio Casa Dudley (Opus). Toedd y beirniaid ddim yn blês iawn gyda llanc ifanc o Benisa’r-waun, a wnaeth gawl potsh o bethau trwy gyfaddef bod ei ffrind wedi’i helpu i baratoi’r crwst ymlaen llaw. A chyfaddefodd ei fod yn cystadlu oherwydd ei fod wedi “ca’l llond bol ia” o weithio mewn “hotel yn Llandudno ia”. Mi fuaswn i’n bendant yn parhau i ddilyn y gyfres petai hwn wedi cael mynd i’r Eidal!
“You gotta lot to answer for…”
Cerys yn chwarae efo tan yn y jyngl -
Marc “Gianni di Marco” Bannerman
